Chapter 7
Yoga of Knowledge & Wisdom

Lyrics :
Sanskrit
Sanskrit English

Verse 21

यो यो यां यां तनुं भक्तः
श्रद्धयार्चितुमिच्छति।
तस्य तस्याचलां श्रद्धाम्
तामेव विदधाम्यहम्॥

Verse 22

स तया श्रद्धया युक्तः
तस्याराधनमीहते।
लभते च ततःकामान्
मयैव विहितान्हि तान्॥

Verse 23

अन्तवत्तु फलं तेषाम्
तद्भवत्यल्पमेधसाम्।
देवान्देवयजो यान्ति
मद्भक्ता यान्ति मामपि॥

Verse 24

अव्यक्तं व्यक्तिमापन्नम्
मन्यन्ते मामबुद्धयः।
परं भावमजानन्तः
ममाव्ययमनुत्तमम्॥

Verse 25

नाहं प्रकाशःसर्वस्य
योगमायासमावृतः।
मूढोऽयं नाभिजानाति
लोको मामजमव्ययम्॥

Verse 26

वेदाहं समतीतानि
वर्तमानानि चार्जुन।
भविष्याणि च भूतानि
मां तु वेद न कश्चन॥

Verse 27

इच्छाद्वेषसमुत्थेन
द्वन्द्वमोहेन भारत।
सर्वभूतानि सम्मोहम्
सर्गे यान्ति परन्तप॥

Verse 28

येषां त्वन्तगतं पापम्
जनानां पुण्यकर्मणाम्।
ते द्वन्द्वमोहनिर्मुक्ताः
भजन्ते मां दृढव्रताः॥

Verse 29

जरामरणमोक्षाय
मामाश्रित्य यतन्ति ये।
ते ब्रह्म तद्विदुःकृत्स्नम्
अध्यात्मं कर्म चाखिलम्॥

Verse 30

साधिभूताधिदैवं माम्
साधियज्ञं च ये विदुः।
प्रयाणकालेऽपि च माम्
ते विदुर्युक्तचेतसः॥

Conclusion

ॐ तत् सत् इति
श्रीमद्‌भगवद्‌गीतासु उपनिषत्सु
ब्रह्मविद्यायां योगशास्त्रे
श्रीकृष्णार्जुनसंवादे
ज्ञानविज्ञानयोगो नाम
सप्तमोऽध्यायः॥